L-operaturi malajr ħadu miżuri volontarji b’solidarjetà man-nies li qed jaħarbu mill-gwerra.
F’Lulju 2023, il-Kummissjoni, flimkien mal-NCEC, l-awtorità regolatorja nazzjonali tal-Ukrajna, iffaċilitat l-estensjoni ta’ tnax-il xahar tal-ftehim bejn 23 operatur Ewropew u seba’ operaturi Ukreni, li ġie ffirmat għall-ewwel darba f’April 2022, biex b’mod reċiproku jbaxxu r-rati li jridu jsostnu biex jikkollegaw is-sejħiet bejn il-fruntieri. Sejħiet affordabbli jippermettu lil dawk li qed ifittxu kenn fl-Ewropa jilħqu l-familja u l-ħbieb fl-Ukrajna, u viċi versa.
Is-sejħiet transfruntiera żdiedu b’mod sinifikanti
Bis-saħħa tad-dikjarazzjoni konġunta, il-ftehim ġie applikat b’mod wiesa’ fl-Ewropa kollha li jiffaċilita l-komunikazzjoni b’modi differenti. L-operaturi Ukreni jistgħu jipprovdu roaming bla ħlas jew affordabbli lill-abbonati tagħhom fl-UE. L-għadd ta’ pajjiżi koperti mill-ftehim qed jiżdied hekk kif aktar operaturi jaderixxu mad-dikjarazzjoni konġunta. Bħala medja, it-tliet operaturi Ukreni joffru jew roaming bi prezzijiet domestiċi, roaming affordabbli jew data mobbli bejn il-fruntieri fi 25-il Stat Membru tal-UE u anke lil hinn — f’madwar 32 pajjiż.
Il-qofol tal-ftehim huwa li jitnaqqsu t-tariffi bl-ingrossa bejn l-operaturi għal sejħiet transkonfinali li jużaw netwerks mobbli differenti. It-tariffi mnaqqsa mbagħad jiġu riflessi fi prezzijiet aktar baxxi għall-utenti finali u komunikazzjoni ffaċilitata bejn il-fruntieri. Dan ifisser li madwar 4,5 miljun Ukren roaming fl-UE jistgħu jċemplu lura f’pajjiżhom lejn l-Ukrajna u jużaw l-internet mobbli b’rati bla ħlas jew affordabbli.
Ir-refuġjati jistgħu jużaw data affordabbli u jagħmlu telefonati bla ħlas jew affordabbli bis-SIM cards Ukreni tagħhom, kif ukoll jagħmlu telefonati affordabbli lill-Ukrajna bis-SIM cards tal-UE tagħhom, distribwiti mill-operaturi tat-telekomunikazzjoni tal-UE. L-impatt tad-Dikjarazzjoni Konġunta dwar ir-refuġjati kif irrappurtat mill-BEREC kien konsiderevoli b’ 80 operatur mobbli tal-UE li offrew telefonati internazzjonali bla ħlas lill-Ukrajna u 44 operatur mobbli tal-UE li joffru telefonati bi prezz orħos. It-tliet operaturi Ukreni kollha offrew ukoll roaming mingħajr ħlas jew roaming bi prezzijiet domestiċi għall-abbonati tagħhom li bħalissa jinsabu fl-UE u joffru wkoll telefonati internazzjonali bla ħlas u bi ħlas imnaqqas lill-UE. Aktar minn hekk, l-operaturi qed joffru telefonati bla ħlas jew irħas lill-vjaġġaturi fl-Ukrajna, li jappoġġaw il-ħafna ħaddiema umanitarji involuti fl-għajnuna fuq il-post. Aktar informazzjoni dwar l-impatt tal-ftehim tista’ tinstab fuq il-paġna web tal-BEREC.
Dan kollu kien possibbli minħabba li l-operaturi ddeċidew li jnaqqsu t-tariffi li jitolbu lil xulxin għall-użu ta’ networks differenti li jippermettulhom jipprovdu servizzi ta’ komunikazzjoni bejn il-fruntieri. L-impatt tad-Dikjarazzjoni Konġunta dwar ix-xejra’ l isfel fil-prezzijiet bl-ingrossa bejn l-operaturi tal-UE u tal-UA huwa kkonfermat mir-rapport tal-BEREC. Pereżempju bħala riżultat tal-impenji volontarji tal-operaturi, ir-rati ta’ terminazzjoni li l-operaturi tal-UA jħallsu lill-operaturi tal-UE li huma firmatarji tal-JS tbaxxew, u huma madwar 70 % inqas mill-medja tal-UE. Barra minn hekk, skont l-operaturi tal-UA, ir-rati bl-ingrossa għar-roaming tad-data li l-operaturi tal-UA jħallsu bħala medja lill-operaturi tal-UE naqsu b’ 30 % u diġà huma ferm taħt il-limiti massimi bl-ingrossa li għandhom jiġu applikati fl-UE abbażi tar-regoli dwar ir-Roaming u għalhekk qed jiffaċilitaw offerti tar-roaming bla ħlas għar-refuġjati Ukreni li jużaw l-UA SIM cards tagħhom.
Din id-Dikjarazzjoni Konġunta tibqa’ miftuħa għall-operaturi kollha li lesti jiffirmaw fi kwalunkwe ħin b’solidarjetà mar-refuġjati mill-Ukrajna. Innota li mhijiex meħtieġa firma fiżika, iżda kumpanija li trid tissieħeb għandha tibgħat email, li tindika r-rieda li tiffirma d-Dikjarazzjoni Konġunta u tehmeż logo tal-kumpanija ma’: [email protected].
Hawn taħt għandek issib id-Dikjarazzjoni Konġunta ffirmata mill-operaturi tal-UE u Ukreni dwar il-konnettività b’appoġġ għar-refuġjati mill-Ukrajna u l-estensjoni tad-Dikjarazzjoni Konġunta.
L-aħħar aġġornament: 20 ta’ Diċembru 2023